Gazeta Shqiptare

lajme shqip, gazeta online, gazeta shqiptare online

Publikimi...

Rreth lajmit...

Titulli: Refuzimi i kandidatëve të Presidentit bëhet me "takt"
Publikuar nga Gazeta Shqip me 7-5-2008

Lajmi...

Refuzimi i kandidatëve të Presidentit bëhet me "takt"

Publikuar nga Gazeta Shqip me 7-5-2008

Pas një muaji debatesh, mazhoranca dhe opozita kanë gjetur gjuhën e përbashkët për ndryshimet në Rregulloren e Kuvendit. Konsensusi mes dy partive të mëdha ka zgjidhur përfundimisht dilemën e socialisteve, të rrinë apo të mos rrinë në seancën parlamentare të ditës së hënë, kur do të kërkohet votimi për ndryshimet e rregullores. Pas dy orë diskutimesh me dyer të mbyllura në mbledhjen e Këshillit të Rregullores, PS-ja vendosi se do të qëndrojë në seancë dhe bashkë me PD-në do të votojnë pro këtyre ndryshimeve. Pas mbledhjes, anëtarët e Këshillit të Rregullores, Dervishi dhe Ceka, kanë zbardhur për mediat gjithçka është diskutuar mes mazhorancës dhe opozitës. Sipas tyre, ndryshimet në Rregulloren e Kuvendit do të reflektojnë ndryshimet në Kushtetutë, të cilat u miratuan pak javë më parë. Kjo do të thotë se janë rregulluar nenet 100, 101, dhe 109 të rregullores, të cilat flasin për mocionin e besimit, të mosbesimit të Kryeministrit dhe për zgjedhjen e Presidentit në përputhje me nenet e ndryshuara në Kushtetutë 87, 104 dhe 105. Gjithashtu është gjetur konsensus mes forcave politike edhe për çështjet me të debatuara, për të cilën opozita është larguar disa herë nga salla e Kuvendit, për dekretet e Presidentit, për anëtarët e Gjykatës së Lartë, por edhe për propozimet e institucioneve të tjera. Për çështjen e dekreteve, këshilli ka rënë dakord që, kur Komisioni i Ligjeve konstaton mospërputhje të kandidatit me kriteret ligjore, atëherë ngarkohet nga Komisioni i Ligjeve, Kryetari i Kuvendit që t‘i komunikojë institucionit të Presidentit që të sjellë një emër tjetër dhe komisioni do të pezullojë votimin në seancë, ndërsa kreu i shtetit të sjellë propozimin e ri. Ky rregull është i vlefshëm edhe për institucionet e tjera kushtetuese, të cilat sjellin në Kuvend propozime kandidatësh, që duhet të miratohen apo të marrin pëlqimin e Kuvendit. Këshilli i Rregullores ka pranuar edhe propozimin e PS-së, e cila kërkon ngritjen e një komisioni të posaçëm që do të vihet në funksionim sa herë të ketë propozime për ndryshimin e Kushtetutës.

Qëndrimi i Dervishit

Deputeti socialist, Besnik Dervishi, deklaroi se "u diskutua për propozimin e deputetëve socialistë që kanë të bëjnë me rregullimin e procedurave që parashikon neni 177 i Kushtetutës, për nismat për rishikimin e Kushtetutës. Gjithashtu siç e dini, këshilli ka diskutuar edhe për rregullimin e neneve të rregullores që i korrespondojnë ndryshimeve që u bënë disa muaj më parë në Kushtetutë, që kanë të bëjnë me nenet 87, 104 dhe 105 të Kushtetutës dhe që i korrespondojnë neneve 100, 101 dhe 109 të rregullores. Ndërkohë janë bërë disa rregullime edhe në nenin 111, që kanë të bëjnë me rastet e emërimit që bën Kuvendi në organet kushtetuese dhe në rastet e dhënies së pëlqimit. Këtu u përcaktuan mjaft qartë të tria rastet, ato kur Kuvendi e ka kompetencë të vetën si propozimin ashtu edhe emërimin në ato organe, siç është rasti i tre anëtarëve të Këshillit të Lartë të Drejtësisë".

Opinioni juaj...

Ju lutemi beni hyrje me llogarin tuaj qe te komentoni!